Alfreð vill fá sænskan landsliðsmarkvörð til Kiel

Alfreð Gíslason, þjálfari Kiel, hefur augastað á sænska landsliðsmarkverðinum Johan Sjöstrand en Kiel leitar nú að eftirmanni franska markvarðarins Thierry Omeyer sem hætttir hjá Kiel eftir næsta tímabili. Sjöstrand spilar með spænska liðinu Barcelona en samningur hans rennur út næsta vor.

Sænska Sportbladet hefur það eftir Klaus Elwardt, framkvæmdastjóra Kiel, að Sjöstrand sé efstur á óskalista þýsku meistarana sem unnu alla titla í boði á síðasta tímabili.

Johan Sjöstrand er jákvæður í garð Kiel en mun ekki taka neina ákvörðun fyrr en eftir Ólympíuleikana þar sem hann verður í aðalhlutverki með sænska landsliðinu. „Kiel er mjög góður klúbbur og eins og er er besti handboltinn spilaður í Þýskalandi. Þetta kemur allt í ljós þegar ég kem heim frá Ólympíuleikunum," sagði Sjöstrand.

„Ég hef talað við bæði Sjöstrand og umboðsmanninn hans og ég vona að við getum gengið frá samningi í september eða október," sagði Klaus Elwardt. Sænskir leikmenn hafa alltaf fundið sig vel hjá Kiel en alls hafa sextán Svíar spilað með félaginu frá 1990.