Engin undanþága fyrr en ráðherra fær svör

Félag kínverska athafnamannsins Huangs Nubo þarf að veita starfandi iðnaðarráðherra svör um umhverfis- og skipulagsmál áður en hún getur tekið ákvörðun um hvort félagið fær undanþágu til að leigja land á Grímsstöðum á Fjöllum.

„Ég verð að fara yfir málið og skoða alla þætti þess,“ segir Oddný G. Harðardóttir, fjármálaráðherra og starfandi iðnaðarráðherra. Hún vill meðal annars upplýsingar um leigusamning sem Huang hyggst gera við félag í eigu sveitarfélaga á svæðinu, um skipulagsmál og umhverfismál í tengslum við fyrirhugaða uppbyggingu.

Oddný kynnti ríkisstjórninni fyrir helgi niðurstöðu nefndar um ívilnanir vegna nýfjárfestinga, sem fjallað hefur um ósk Huangs um að fá að leigja jörðina Grímsstaði á Fjöllum og reisa þar hótel. Nefndin leggur til að gerður verði fjárfestingasamningur við félag Huangs. Í slíkum samningi myndi felast undanþágan sem félag í eigu erlends aðila þarf til að geta leigt jörðina. Oddný bendir á að gera þurfi samninginn við íslenskt félag í eigu Huangs, og það félag hafi ekki enn verið stofnað.

„Ég geri ráð fyrir því að aðstandendur þessa félags hafi samband við okkur í iðnaðarráðuneytinu til að fara yfir aðra þætti þessa verkefnis og hvernig þeir spila saman við fjárfestingasamninginn,“ segir Oddný.

Hún fagnar því að ívilnunarnefndin telji öll skilyrði fyrir gerð samnings uppfyllt. „Við erum að sækjast eftir erlendri fjárfestingu og erlendu fjármagni inn í landið,“ segir Oddný.

„Við eigum von á að fá gögn frá ráðuneytinu varðandi samning á næstu dögum,“ segir Halldór Jóhannsson, umboðsmaður Huangs hér á landi. Hann segir ljóst að öll skilyrði sem ívilnunarnefndin hafi fjallað um hafi verið uppfyllt, og málið muni vonandi skýrast á næstu dögum.

„Ég held að ráðherrann geti ekki farið gegn niðurstöðu þessarar fagnefndar,“ segir Halldór. Hann segir enga ástæðu til að ætla að slíkt standi til, og að málið sé í réttum farvegi hjá stjórnvöldum. Til að fyrirhuguð uppbygging á svæðinu geti hafist þarf Huang að gera fjárfestingarsamning til tíu ára við ríkið.

Félag sem sveitarfélög á svæðinu hafa stofnað þurfa að auki að kaupa landið og leigja Huang það. Til stendur að leigan á landinu verði til 40 ára.

Halldór segir að náist þetta í gegn verði strax farið að huga að hönnun og skipulagi á svæðinu. Hann segir að ólíklegt sé að verklegar framkvæmdir geti hafist á þessu ári, en stefnt sé að því að hefja rekstur hótelsins árið 2016.

brjann@frettabladid.is