Borgarbyggðardómurinn gildir líka um styttri lán

„Niðurstaða Héraðsdóms Reykjavíkur styður þau sjónarmið sem ég hef kynnt fjármálafyrirtækjunum að Borgarbyggðardómur hafi fordæmisgildi varðandi skemmri lán sem borgað var í nokkurn tíma," segir Helgi Hjörvar, formaður efnahags- og viðskiptanefndar, um dóm Landsbankans gegn fyrirtækinu Samvirkni í Héraðsdómi Reykjavíkur í morgun.

Þar komst dómari að þeirri niðurstöðu að Landsbankanum hafi ekki verið heimilt að reikna seðlabankavexti af ólöglegu gengistryggðu bílaláni aftur í tímann.

Fyrirtækið átti að greiða tæplega 1,9 milljón króna í vexti byggða á Árna Páls-lögunum svokölluðu, en því var mótmælt. Niðurstaðan var sú að kröfuna skyldi lækka um þá upphæð.

Málið er nátengt Borgarbyggðardómnum svokallaða en héraðsdómur fylgir fordæmi Hæstaréttar Íslands í því máli að fullnaðarkvittanir gildi.

Lýsing og Landsbankinn vildu ekki hefja útreikningar á ólöglegum gengistryggðum bílalánum í samræmi við nýlega dóma Hæstaréttar þar sem þeir vildu meina að dómur Borgarbyggðar ætti ekki við skemmri lán, það er að segja bílalán, eingöngu gengistryggð húsnæðislán.

Niðurstaðan í dag styður aftur á móti að hið sama gildi um gengistryggð bílalán, það er að segja styttri lán, en lántakandinn tók lánið árið 2006.

„Ég vænti þess að Landsbankinn og Lýsing hljóti nú að fylgja í kjölfar Arion banka og Íslandsbanka," segir Helgi en fyrrnefndir bankar fóru strax í útreikningar þegar Borgarbyggðardómurinn féll.