Fróaði sér fyrir framan börn sem voru að stökkva í foss í Elliðaárdal

Hæstiréttur staðfesti sex mánaða skilorðsbundið fangelsi yfir 56 ára karlmanni sem fróaði sér í augsýn þriggja stúlkna á 14. og 15. aldursári. Maðurinn neitaði sök en hann á engan sakaferil að baki.

Atvikið átti sér stað við veitingastaðinn Sprengisand í Elliðaárdal í reykjavík í júlí árið 2010. Samkvæmt ákæru hneppti maðurinn frá buxum sínum, togaði bol sem hann klæddist yfir klof sitt, setti hönd sína á kynfærin og fróaði sér í augsýn barnanna.

Stúlkurnar sögðu við lögreglumenn á vettvangi að þær hafi verið að leika sér að stökkva í fossinn þegar þær tóku eftir að maðurinn hafi legið í grasinu skammt frá þeim, og verið að stara á þær. Hann hafi síðan farið ofan í buxurnar sínar og fróað sér. Þá sögðu þær að hann hafi ávarpað þær og spurt hvor þær væru fyrirsætur, eða eitthvað annað í þeim dúr.

Maðurinn neitaði sök, en sagðist hafa rætt við stúlkurnar og varað þær við hættum í fossinum. Hann sagðist ekki hafa snert á sér kynfærin en ítrekaði að hann hefði verið að nudda á sér fæturna og kviðinn, þar sem hann ætti við erfiðleika að etja í ristli. Þegar þannig bæri undir færi hann inn undir bolinn og nuddaði beran kviðinn til að lina þjáningar sem þessu stöfuðu. Stúlkunum hefði missýnst að fóturinn væri getnaðarlimurinn.