Snekkjusmiður í Abu Dhabi laus allra mála

Íslenskur snekkjusmiður sem var sakaður um skjalafals í Abu Dhabi í Dubaí er laus allra mála, eftir því sem fram kemur í þarlendum fjölmiðlum. Hann sat í gæsluvarðhaldi um tímabil en var látinn laus gegn greiðslu 1,7 milljóna króna tryggingargjalds. Dómstóll í Dubai komst að þeirri niðurstöðu að ekki væru nægar sannanir í málinu gegn manninum. Maðurinn hefur alltaf neitað sök.

Málavextir eru þeir að Íslendingurinn leitaði að fjárfestum til að stofna fyrirtæki um smíði á snekkjum. Komst hann í samband við fjársterkan aðila sem hafði áhuga á að fjárfesta í fyrirtæki hans, en bað fyrst um að smíðuð yrði fyrir sig snekkja.

Íslendingurinn gekk að þeim skilmálum með því fororði að fjárfesting í fyrirtækinu kæmi til á móti. Snekkjunni var skilað til væntanlegs fjárfestis en hann stóð ekki við sinn hluta samkomulagsins. Snekkjan mun hafa kostað um 130 milljónir íslenskra króna. Íslendingurinn höfðaði mál árið 2010, sem hann vann, en var síðar ákærður fyrir að hafa falsað skjal sem hann lagði fram í málinu upphaflega.