Gnarr fer á færeyskt Gaypride í Þórshöfn

„Búningurinn verður surprise,“ segir Jón Gnarr, borgarstjóri í Reykjavík, sem tekur þátt í gleðigöngunni Faroe Pride í Færeyjum á föstudaginn.

Jón verður gestur Þórshafnar frá því á morgun og þar til á mánudag. Hann tekur þátt í ýmsum dagskrárliðum sem hluta af opinberu heimsókninni, meðal annars Ólafsvökunni víðfrægu. Faroe Pride er þó ekki hluti af dagskránni sem gestgjafarnir hafa skipulagt fyrir reykvíska borgarstjórann.

„Ég frétti eftir á að gangan væri á sama tíma og ég er þarna þannig að ég bað um að fá að taka þátt í henni. Aðstandendur göngunnar voru himinlifandi,“ segir Jón sem kveðst einfaldlega hafa viljað nota tækifærið til að styðja réttindabaráttu samkynhneigðra í Færeyjum. Þar er umburðarlyndi fyrir samkynhneigð ekki það sama og á Íslandi og málefnið því umdeildara en hér.

„Eitt sem við Íslendingar höfum að miðla er mannréttindi, umburðarlyndi og náungakærleikur. Við erum til algerrar fyrirmyndar þegar kemur að réttindamálum samkynhneigðra,“ undirstrikar borgarstjórinn, sem játar því að vera búinn að máta búning fyrir gönguna en kveður hann þó leyndarmál þar til í göngunni síðdegis á föstudaginn sem fyrr segir.

Jón kveðst oft hafa furðað sig á að ekki skuli vera meiri samgangur milli Íslendinga og Færeyinga og Grænlendinga. Stuðla megi að breytingu á því í gegnum samstarf borgarinnar við höfuðstaðina Nuuk og Þórshöfn. „Ég hef lýst því yfir þegar ég hef hitt fulltrúa frá Þórshöfn og Nuuk að ég hafi áhuga á því að auka samstarfið,“ segir Jón.

Borgarstjórinn segir áberandi hversu margir Íslendingar hafi á orði að þá hafa alla tíð langað að fara til Færeyja og Grænlands en fáir láti samt verða af því. Sjálfur sé hann einmitt einn af þeim sem hafi alltaf langað til Færeyja en aldrei farið.

„Ég hlakka til að sjá Færeyjar og Þórshöfn,“ segir Jón sem meðal annars fær útsýnissiglingu í eyjuna Koltur á fimmtudaginn. „Síðan fæ ég að sjá nokkur atriði á Ólafsvökunni og upplifa hvernig hún er. Þetta verður mjög spennandi.“

gar@frettabladid.is