Tilboð Kvosar var hagstæðast

Þorkell Sigurlaugsson, stjórnarformaður Framtakssjóðs Íslands, segir að tilboð Kvosar í Plastprent hafi verið hagstæðasta tilboðið sem barst. Hann segir að Framtakssjóðurinn verði að fara eftir verklagsreglum sínum í formlegu söluferli á félagi en geti ekki sest í siðferðilegt dómarasæti og miðað við hvað sé sanngjarnt út frá óskilgreindum forsendum.

„Ef við ætluðum að setjast í eitthvert dómarasæti þá myndum við þurfa að skilgreina mjög vandlega fyrirfram hvað skilyrði við erum að setja fyrir því hver kaupir félög og hvað þau megi hafa fengið mikið afskrifað hjá lánastofnunum," segir Þorkell. „Við getum ekki farið að búa til einhver viðmið um eðlilegar afskriftir skulda eða gera einhverja eftirá skýringu hvað það varðar."

Hann bendir á að gríðarlega mörg félög hafi fengið afskriftir skulda eftir hrunið. Það væri óhæfa að meina þeim að taka þátt í efnahagslífinu og byggja sig aftur upp fyrir þær sakir.

Fram hefur komið að fulltrúi Landsbankans í stjórn Framtakssjóðsins lagðist gegn því að tilboð Kvosar væri samþykkt. Þorkell segir að það sé stefna innan stjórnarinnar að gefa ekki upp hvernig einstök atkvæði leggjast. „Það eru auðvitað ekkert allir alltaf sammála um allt í stjórnum fyrirtækja, en við höfum ekki í stjórn Framtakssjóðsins tjáð okkur um það opinberlega," segir Þorkell.

Þorkell Sigurlaugsson segir að málið hafi farið í formlegt söluferli sem Straumur fjárfestingabanki sá um. Enn á eftir að ganga frá kaupum Kvosar og þau eru enn háð því að samþykki fáist hjá Samkeppniseftirlitinu.