"Auðvitað líður mér ekki vel yfir þessu“

Stjórnarformaður Eirar segist miður sín yfir þeirri stöðu sem upp er kominn hjá félaginu en segist þó ekki ætla að víkja. Hann vissi af fjárhagserfiðleikum fyrir tæpu einu og hálfu ári en tókst ekki að bjarga málum.

Fjárhagsstaða Eirar er afar slæm eins og Stöð 2 hefur greint frá síðustu daga. Átta milljarða skuldir, neikvætt eigið fé, veðsett hjúkrunarheimili og ævisparnaður nokkur hundruð gamalmanna mögulega horfinn.

Hvernig gat þetta gerst spyrja margir. Ein af ástæðunum eru nýbyggingar í Grafarvogi sem voru byggðar á árunum eftir hrun. Þegar flest allir sýndu aðhald í rekstri héldu Eirar menn ótrauðir áfram á lánum sem síðan hafa snarhækkað.

Reksturinn hefur í raun verið í uppnámi um nokkurt skeið þó vandinn sé aðeins nýkominn upp á yfirborðið. Til dæmis tapaði Eir um 900 milljónum á árunum 2010 og 2011 samkvæmt ársreikningi sem fréttastofa hefur undir höndum.

En það var einmitt árið 2011 sem fyrstu merki þess sjást að stjórnendur séu meðvitaðir um vandann. Það var í ágúst 2011 sem þáverandi framkvæmdastjóri, Vilhjálmur Þ. Vilhjálmsson, og fjármálastjórinn gerðu fjárhagsáætlun til að bregðast við vandanum til næstu 16 mánaða.

Fréttastofan er með þessar áætlanir undir höndum og þær ganga í stuttu máli út á að selja einn íbúðarétt, fyrir 32 milljónir, á mánuði í 16 mánuði. Þannig átti að fá 512 milljónir. Og að gera tvo leigusamninga á mánuði sem myndu færa Eir um tvær fimm milljóna eingreiðslur. Þannig átti að fá 160 milljónir. Og því samtals 662 milljónir í aukatekjur á 16 mánuðum..

Til marks um það hversu slæm staðan er þá skal tekið fram að ef þessir bjartsýnu áætlanir hefðu gengið eftir, sem þær gerðu alls ekki, hefði Eir samt sem áður tapað einni og hálfri milljón á hverjum einasta mánuði.

Í síðustu fundargerð stjórnar Eirar, sem fréttastofa hefur einnig undir höndum, kemur fram að fjármálastjórinn sendi í ágúst 2011 þáverandi framkvæmdastjóra, það er að segja Vilhjálmi Þ., tölvupóst þar sem bent er á alvarleika málsins ef t.d. forsendur þessara útreikninga mundu bregðast sem svo sannarlega varð raunin.

Þrátt fyrir þetta segir stjórnarformaðurinn og fyrrverandi framkvæmdastjóri að staðan eins og hún birtist nú komi á óvart.

Vilhjálmur gagnrýnir endurskoðendur Eirar fyrir að hafa ekki gert athugasemdir við reksturinn. Hann stakk raunar upp á því á síðasta stjórnarfundi að Ríkisendurskoðun myndi rannsaka síðustu ár hjá Eir og leita skýringa. Ríkisendurskoðun hafnaði þeirri beiðni í dag, segir það ekki sitt hlutverk.

Vilhjálmur segist miður sín yfir þeirri stöðu sem upp er kominn en segist fullviss um að hægt sé að leysa málið þannig að íbúðarétthafar tapi ekki peningum.

„Auðvitað líður mér ekki vel um þá stöðu sem er komin upp - við höfum brugðist við þessu af fullum krafti. Það er hægt að leysa þetta af góðum vilja þannig að sú lausn geti sum sé vonandi tryggt að íbúðareigendur verði ekki fyrir skaða - ég vil vera bjartsýnn á að okkur takist það," segir Vilhjálmur.