Það er bannað að stíga á strik!

Ég þekki unga dömu sem heldur því fram að ef hún stígi á strik verði hún ekki prinsessa. Strikin eru mörg sem á vegi hennar verða, en með eftirtekt og gætni forðast hún strikin, og verður hún líklega prinsessa að lokum. Það væri óskandi að núverandi stjórnvöld veittu þeim hættulegu strikum sem á vegi þeirra verða sömu eftirtekt og vöruðust þau. Við hjá Reitum fasteignafélagi höfum fylgst með baráttu ferðaþjónustunnar við fyrirhugaðar skattahækkanir á gistingu, sem boðaðar eru í fjárlagafrumvarpi ársins 2013. Við teljum málið okkur skylt þar sem mörg af helstu hótelfyrirtækjum landsins eru í viðskiptum við félagið, og með því er vegið að rekstrargrundvelli þeirra.

Aukin svört vinna

Í fyrsta lagi segir sagan okkur að afleiðing mikilla skattahækkana er aukning á svartri atvinnustarfsemi. Það fer ekki fram hjá þeim sem fylgjast með ferðaþjónustu í Reykjavík að gríðarleg fjölgun hefur orðið á íbúðum sem leigðar eru til ferðamanna og ljóst að flestar eru leyfislausar og svo virðist sem svört atvinnustarfsemi sé látin viðgangast átölulaust af hálfu stjórnvalda. Svo virðist sem langstærstur hluti þessarar leyfislausu starfsemi sé skipulagður af erlendum bókunarvélum og í mörgum tilfellum kemur greiðslan fyrir gistinguna ekki einu sinni til landsins. Undanfarið hefur fjölgun íbúðanna verið mæld í hundruðum á hverju misseri.

Í öðru lagi hefur það vakið athygli mína í umræðu um hækkun virðisaukaskatts á gistingu að stjórnvöld hafa haldið því fram að slíkur rekstur fái meira endurgreitt en greitt er í útskatt. Fyrrverandi fjármálaráðherra gekk jafnvel svo langt að tala um ríkisstyrkta atvinnugrein. Hægt er að sýna fram á að ef tekið er tillit til þess virðisauka sem verður til í heildarferlinu við að selja ferðamanni gistingu skilar það ferli umtalsverðum virðisaukaskatti í ríkissjóð. Það liggur fyrir að hótel sem leigja hjá fasteignafélögum sbr. Reitum greiða 25,5% virðisaukaskatt af leigu og er honum skilað til ríkisins af fasteignafélaginu eins og lög gera ráð fyrir. Þá á eftir að horfa til þeirrar verðmætisaukningar sem verður í öðrum atvinnugreinum vegna viðskipta við hótelfyrirtæki.

Ekki hlustað á rök

Í þriðja lagi er óskiljanlegt að stjórnvöld skuli ekki hlusta á þau rök rekstraraðila hótelanna að búið sé að gera samninga við ferðaheildsala um stóran hluta næsta árs og því munu hótelin þurfa að taka mikinn hluta hækkunarinnar á sig. Stjórnvöld eru hvött til að stíga ekki á strik í þessu máli, en hvort þau verða einhvern tímann að prinsessu skal ósagt látið. Skynsamlegast væri að hætta alfarið við þessi áform og leyfa ferðaþjónustunni að dafna og skila sífellt meiru í þjóðarbúið með auknum umsvifum.