Telja lögfræðing Orkustofnunar vanhæfan

Skúli Thoroddsen, lögfræðingur Orkustofnunar, er vanhæfur til að fjalla um virkjanahugmyndir rammaáætlunar.

Þetta er mat Guðmundar Harðar Guðmundssonar, formanns Landverndar, sem sendi þingmönnum í atvinnuveganefnd og umhverfis- og samgöngunefnd Alþingis og Guðna A. Jóhannessyni orkumálastjóra bréf þess efnis í gær.

Að mati Guðmundar hefur Skúli gert sig vanhæfan til að taka þátt í hlutlægri afgreiðslu Orkustofnunar um virkjanahugmyndir „með eindregnum yfirlýsingum um einstaka virkjanahugmyndir og virkjanamál almennt“, að því er segir í bréfinu. Þar er vísað til ummæla Skúla síðan í fyrravor, þar sem hann sagði meðal annars á heimasíðu sinni að mikilvægt væri að ríkið ýtti undir frekari virkjanaframkvæmdir, meðal annars í neðri hluta Þjórsár.

„Þess vegna er enn mikilvægara að ríkisvaldið beiti sér sérstaklega fyrir stórátaki og þá dugir ekki bara stækkun álversins í Straumsvík, Búðarhálsvirkjun, kísilmálmverksmiðja í Helguvík, hreinkísilverksmiðja í Grindavík og natríumklóratverksmiðja á Grundartanga,“ ritaði Skúli á heimasíðu sinni. „Betur má ef duga skal. Nærtækasta og öflugasta verkefnið er enn og aftur álverið í Helguvík, en þá þarf að virkja í neðri hluta Þjórsár.“

Formaður Landverndar fer fram á að umsögn Orkustofnunar um rammaáætlun verði dregin til baka í ljósi þessa og að hún verði unnin af óhlutdrægu fagfólki stofnunarinnar.- sv