Hagnaður Lánssjóðs sveitarfélaga minnkar milli ára

Lánasjóður sveitarfélaga skilaði 430 milljóna kr. hagnaði á fyrstu sex mánuðum ársins. Þetta er nokkuð minni hagnaður en á sama tímabili í fyrra þegar hann nam 519 milljónum kr.

Í tilkynningu til Kauphallarinnar segir að útborguð langtímalán á tímabilinu námu 3.765 milljónum króna samanborið við 3.495 milljónir króna á sama tímabili í fyrra.

„Sjóðurinn hefur aldrei tapað útláni frá því að hann hóf starfsemi árið 1967 og hefur því engan afskriftareikning útlána í bókum sínum. Sveitarfélög hafa heimild í lögum til að veita sjóðnum veð í tekjum sínum sem tryggingu fyrir lánum sem þau taka hjá sjóðnum. Í lok tímabilsins voru 99% útlána sjóðsins til sveitarfélaga og fyrirtækja í þeirra eigu með slíkt veð. Vanskil við undirritun þessa árshlutareiknings voru engin," segir í tilkynningunni.

„Niðurstöðutala efnahagsreiknings í lok tímabilsins var 71.310 milljónir króna á móti 72.362 milljónum króna í árslok 2011. Útlán sjóðsins námu 62.392 milljónum króna í lok tímabilsins. Eigið fé nam 15.084 milljónum króna á móti 15.129 milljónum króna í árslok 2011 og hefur minnkað um 0,3% á tímabilinu."

Þá kemur fram að eignfjárhlutfall sjóðsins nemur 59%.