Vaxtagreiður og erlend lán veikja gengi krónunnar

Gengi krónunnar hefur lækkað um 3% frá því um miðjan mánuðinn en þessi þróun er þvert á það sem gerðist á sama tíma fyrir ári síðan. Þá hélt gengi krónunnar áfram að styrkjast fram að október vegna innstreymis gjaldeyris frá ferðamönnum.

Greining Íslandsbanka segir að ástæðurnar fyrir gengislækkuninni megi að hluta til rekja til þess að erlendir eigendur ríkisbréfaflokks hafi getað tekið út 1,6 milljarða króna í vaxtagreiðslur og uppgreiðslu á þessum flokki fyrir helgina. Þá megi einnig nefna að Reykjanesbær greiddi upp erlent lán til Depfa bankann upp á 800 milljónir króna.

„Eins og við höfum bent á þá er það nokkuð athyglisvert að lækkun á gengi krónunnar eigi sér stað á þessum árstíma, en á sama tíma í fyrra var gengi krónunnar að hækka, og sú þróun hélt áfram út októbermánuð," segir í Morgunkorni greiningarinnar.

„Það sem kann að hafa áhrif á þróunina undanfarið er útflæði tengt vaxtagreiðslum og uppgreiðsla erlendra lána. Þannig var ríkisbréfaflokkurinn RIKB12 á gjalddaga sl. föstudag en sá flokkur var að mestu leyti í eigu erlendra aðila.

Ætla má að vaxtagreiðslur til útlendinga vegna RIKB12 hafi numið u.þ.b. 1,6 milljörðum kr., en þeim er heimilt að kaupa gjaldeyri fyrir slíkar greiðslur undir núverandi gjaldeyrisreglum. Annað sem má nefna er að Reykjanesbær tilkynnti í gær að í kjölfar á sölu bæjarins á skuldabréfi sem bærinn fékk við sölu HS orku á sínum tíma yrði greitt upp erlent lán við Depfa bankann upp á 800 milljónir kr."