Spá um auknar fjárfestingar í íbúðarhúsnæði vekur spurningar

„Seðlabankinn verður að gera grein fyrir þessum tölum sínum í ljósi þess að íbúðaverð hér hefur hækkað á undanförnum árum," segir Ólafur Ísleifsson, hagfræðingur, um tölur sem birtust í Peningamálum bankans í dag þar sem áætlað er að fjárfesting í íbúðarhúsnæði muni aukast um 16-19% á ári næstu tvö ár.

Ólafur telur að bankinn verði að skýra á hverju hann grundvalli þessa spá. Verð á fasteignamarkaði er nokkuð hátt um þessar mundir og ekki fýsilegt fyrir ungt fólk að kaupa sínar fyrstu eignir. Þess vegna vekur spá bankans um aukna fjárfestingu upp spurningar.

„Seðlabankinn verður sömuleiðis að gera grein fyrir því á hvern veg hann telur unnt að koma í veg fyrir frekari eignabólu á fasteignamarkaði og hlutabréfamarkaði sem stafar af gjaldeyrishöftunum og þeirri staðreynd að mikið fé leitar í þessar eignir sem annars færi til kaupa á erlendum eignum," segir Ólafur.