Skotsýning Litháa fyrir utan þriggja stiga línuna sá til þess að liðið landaði sigri gegn Túnis í dag og sæti í átta liða úrslit körfuknattleikskeppni Ólympíuleikanna.
Um hreinan úrslitaleik þjóðanna um sæti í átta liða úrslitum var að ræða en fyrirkomulag körfuknattleikskeppninnar er það sama og í handboltanum þar sem leikið er í tveimur sex liða riðlum.
Afríkumeistarar Túnis höfðu frumkvæðið í leiknum og útlitið gott fram í þriðja fjórðung. Frábær sprettur Litháa fyrir utan þriggja stiga línuna sá til þess að munurinn minnkaði og sá að lokum fyrir þrettán stiga sigri 76-63.
Litháar stóðu vel í Bandaríkjunum og gott betur í síðustu viðureign sinni. Því kom á óvart að þeir skyldu lenda í vandræðum með Túnisa. Síðasti æfingaleikur Litháa fyrir leikana var gegn Íslendingum þar sem heimamenn höfðu 50 stiga sigur, 101-51.
Lokaniðurröðun þjóðanna í riðlinum er enn óráðin. Frakkar eiga þessa stundina í fullu tré við Nígeríu og í kvöld mætast Bandaríkin og Argentína í lokaleik riðilsins.
Í B-riðli unnu Ástralir óvæntan sigur á Rússum og tryggðu sér annað sæti riðilsins. Tapið skipti Rússa engu máli því þeir höfðu þegar tryggt sér efsta sæti riðilsins.
Brasilía og Spánn mætast í kvöld í úrslitaleik um hvort liðið hafnar í þriðja sæti riðilsins. Bæði lið eru þó örugg áfram.
Litháen slapp í átta liða úrslitin | Ástralir lögðu Rússa
