Ágreiningur í Árborg um Skólaskrifstofu Suðurlands

„Það er engin úlfúð í þessu máli," segir Elfa Dögg Þórðardóttir, bæjarfulltrúi Sjálfstæðisflokksins í Árborg en hún leggst alfarið gegn hugmyndum sveitarfélagsins um að segja sig úr Skólaskrifstofu Suðurlands. Sjálfstæðisflokkurinn er með hreinan meirihluta í bænum en fjórir bæjarfulltrúar hið minnsta eru sammála ákvörðun fræðslunefndar Árborgar, um að segja sveitarfélagið úr Skólaskrifstofum Suðurlands.

Það þýðir að Árborg hættir að reka slíka þjónustu ásamt fjölmörgum öðrum sveitarfélögum á Suðurlandi og færir þess í stað alla þjónustu til Árborgar. Slíkt bitnar þá helst á þeim sveitarfélögum sem hingað til hafa rekið skrifstofuna með Árborg, en höfuðstöðvar Skólaskrifstofu Suðurlands eru á Selfossi.

Elfa Dögg er jafnframt formaður stjórnar SASS, Samtaka sunnlenskra sveitarfélaga, spurð hvort formannsseta hennar geri hana vanhæfa, í ljósi þess að önnur sunnlensk sveitarfélög vilja halda óbreyttu samstarfi áfram, svarar Elfa því til að hún sé ekki vanhæf til þess að greiða atkvæði um málið.

Hún segir samt í viðtali við sunnlenska fréttavefinn, dfs.is, að málið sé henni erfitt í ljósi þess að hún er bæjarfulltrúi Árborgar og formaður SASS.

„Jú, ég er sett í mjög erfiða stöðu enda er ég á móti því að Árborg segi sig úr skólaskrifstofunni og mun ég ekki samþykkja tillöguna. Það er ástæða fyrir því að farið var í samstarf um skólaskrifstofu á sínum tíma sem er að við búum á fámennu og dreifbýli svæði og með samvinnu um þessa þjónustu tryggjum við að börn í stórum sem smáum sveitarfélögum, fái öll jafnan aðgang að góðri og faglegri þjónustu," segir hún í viðtali við dfs.

Eyþór Arnalds, bæjarfulltrúi Sjálfstæðisflokksins í Árborg, segir allar breytingar á skólamálum viðkvæmar. „Það er auðvelt að misskilja þetta, en svo það sé á hreinu þá er ekki verið að skerða þjónustuna," útskýrir Eyþór sem er hlynntur breytingunum. Hann segir viðkvæmasta snertiflöt málsins vera aðkoma annarra sveitarfélaga að málinu. Nú þurfa þessi sveitarfélög að koma upp eigin skólaskrifstofum í stað þess að ráðgjafar og sérfræðingar séu sendir út af örkinni, frá Selfossi, í hvert sveitarfélag þegar þörf er á störfum þeirra.

Eyþór bendir á að Árborg sé áttunda stærsta sveitarfélagið á landinu, og það sé því eðlilegt að þar sé boðið upp á sérstaka þjónustu eins og til stendur að samþykkja. Málið hefur þegar verið afgreitt út úr fræðslunefnd. Næst verður það tekið fyrir á fundi bæjarráðs og að lokum á bæjarstjórnarfundi verði það samþykkt áður. Eyþór segir þó að það sé nægur tími til stefnu, því það er ekki fyrr en í júlí sem það þarf að taka málið fyrir. Eins og fyrr segir liggur fyrir að fjórir bæjarfulltrúar eru hlynntir málinu. Það er því meirihluti fyrir ákvörðuninni, eins og staðan er núna.