Skyggnst inn í heim prestsins

Heimildarmyndin Hreint hjarta verður frumsýnd í Bíói Paradís og Sambíóunum Selfossi í kvöld. Myndin, sem hlaut áhorfendaverðlaunin á Skjaldborgarhátíðinni, fjallar um Kristin Ágúst Friðfinnsson, sóknarprest á Selfossi.

"Ég kannaðist aðeins við hann því ég er ættaður úr þessari sveit, Flóanum, þar sem hann hefur starfað í tuttugu ár. Mér hefur alltaf fundist hann áhugaverður karakter," segir leikstjórinn Grímur Hákonarson um tilurð myndarinnar. "Ég bar þetta undir hann hvort ég mætti fylgja honum eftir í hans störfum.

Á sama tíma stóð hann í smá ströggli innan kirkjunnar. Ég hafði líka áhuga á að skyggnast inn í þennan heim prestsins sem fólk fær sjaldan að vita um. Prestar eru að vinna með fólki í sálgæslu og þeir gera fleira sem ekki er mikið talað um eins og að fara í hús og kveða niður drauga."

Grímur hefur gert fjölda stutt- og heimildarmynda og eina kvikmynd í fullri lengd, Sumarlandið, sem kom út 2010. Hann gerði einnig stuttmyndina Bræðrabyltu sem vann til 25 alþjóðlegra verðlauna.

Hreint hjarta er þriðja heimildarmyndin um presta sem kemur út á skömmum tíma. Jón og séra Jón fékk Skjaldborgarverðlaunin í fyrra og árið 2010 var á sömu hátíð sýnd prestamyndin Liljur vallarins.

- fb