Lúðvík og Sigurvin verða kallaðir á fund

Tveir lögmenn Bonafide lögmanna verða kallaðir á fund efnahags- og viðskiptanefndar vegna greinar sem þeir skrifuðu á Vísi á þriðjudaginn var um innheimtu ólögmætra gengislána. Þetta staðfestir formaður efnahags- og viðskiptanefndar, Helgi Hjörvar í samtali við fréttastofu.

Guðlaugur Þór Þórðarson, þingmaður Sjálfstæðisflokks, lagði til við Helga að nefndin fundaði með lögmönnunum Sigurvin og Lúðvíki vegna greinarinnar, en þar veltu tvímenningarnir m.a. upp þeirri spurningu hvort ólögmæt lán gætu farið í vanskil og sögðu að það væri skylda stjórnvalda að beita sér fyrir gerð samninga um ákveðnar afborganir af lánunum á meðan óvissuástand ríkir um endanlega niðurstöðu.

Guðlaugur telur mikilvægt að fylgjast náið með framvindu mála varðandi gengistrygginguna, en fregnir hafa borist af því að kröfuhafar gangi fram af hörku við að innheimta umrædd lán. Hann telur einnig mikilvægt að reyna að fyrirbyggja að ríkið verði skaðabótaskylt vegna vanrækslu í þessum málum, en lögfræðingarnir tveir benda á í grein sinni að ríkið gæti orðið bótaskylt fyrir að hafa vanrækt eftirlitsskyldu ef fjármálafyrirtækin fara á hausinn og skuldarar sem hafa ofgreitt lán sín fá ekkert til baka.

Guðlaugur telur einnig að fundurinn geti orðið fyrsta skref hjá stjórnvöldum í að smíða samninga um ákveðnar afborganir af gengistryggðum lánum á meðan óvissuástand ríkir. Lögmennirnir halda því fram að meðan ekki liggur fyrir hvernig á að gera lánin endanlega upp sé eðlilegasta afborgun af gengistryggðu láni 0 krónur á mánuði, nema samið sé um annað. Þeir hvetja stjórnvöld til að beita sér í þeirri samningsgerð því ekki sé eðlilegt að fjármálafyrirtæki ákveði einhliða greiðslu. Slíkir samningar verða að líkindum ræddir á fundinum.

Guðlaugur vill fá lögmennina tvo á fund nefndarinnar auk fulltrúa frá Samtökum Lánþega, Hagsmunasamtökum heimilanna, FME og fjármálafyrirtækjunum.