Greiðslu VBS til TM eftir ríkislán rift

Tryggingamiðstöðin hf. (TM) var í gær gert að greiða þrotabúi VBS Fjárfestingabanka 160,3 milljónir króna auk vaxta vegna afsals eignar úr bankanum á tíma sem TM hafi átt að vera fullkunnugt um bága fjárhagsstöðu VBS.  Bankinn fór í slitameðferð nokkrum mánuðum eftir að eignin var færð til TM.

Dómurinn í gær snýst um að VBS seldi félagið Nesvelli ehf. til TM í nóvember 2009 á 160,3 milljónir króna.  Öllum veðréttum var aflétt af eigninni áður en gengið var frá sölunni. Greitt var fyrir „með lækkun skuldar við kaupanda“.  Slitastjórn VBS telur að stjórnendur bankans hafi nýtt aukin líftíma sem hann fékk með láni frá íslenska ríkinu í byrjun árs 2009 til að gera upp við valda kröfuhafa, meðal annars TM. Hún höfðaði því riftunarmál sem vannst í héraðsdómi Reykjavíkur í gær. TM þarf að endurgreiða alla upphæðina ásamt vöxtum þrátt fyrir að hlutafé í Nesvöllum sé í dag metið einskis virði.

Afsalið fór fram eftir að íslenska ríkið hafði lánað VBS 26,4 milljarða króna í mars 2009 til að halda svokölluðum veðlánakröfum á bankann lifandi, en þær hafði ríkissjóður keypt af Seðlabanka íslands eftir hrun. VBS bókfærði síðan 9,4 milljarða króna af láninu sem tekjur í ársreikningi sínum fyrir árið 2008. Eftir að VBS fór formlega í þrot í á vormánuðum 2010 kom í Ijós að bankinn hafði verið ógjaldfær frá því í febrúar 2008 og að eignir bankans  hefðu verið stórlega ofmetnar í efnahagsreikningi hans. Alls var lýst kröfum í bú hans fyrir um 48 milljarða króna.Talið er að óveðtryggðir kröfuhafar fái um 900 milljónir króna upp í tugmilljarða kröfur sínar.

Forsaga málsins er sú að TM, sem þá var nýkomin í eigu FL Group, lagði um 2,5 milljarða króna inn á peningamarkaðsreikning hjá VBS í febrúar og mars 2008. Féð notaði VBS síðan til að kaupa hlutabréf í FL Group, alls um 208 milljónir hluta. Gengi bréfa í FL Group á þessum tíma var um 12 krónur á hlut.

VBS seldi síðan Styrk Invest, félagi í eigu Jóns Ásgeirs Jóhannessonar og aðila tengdum honum, bréfin til baka í lok júlí 2008. Styrkur var þá stærsti einstaki eigandi FL Group, sem á þeim tíma hafði tekið upp nafnið Stoðir. Bréfin voru keypt á genginu 6,6 krónur á hlut, um 1,4 milljarða króna, og því ljóst að VBS og hluthafar bankans höfðu tapað rúmum milljarði króna á þeim skamma tíma sem bankinn átti bréfin. VBS lánaði auk þess að fullu fyrir kaupunum. Þetta kemur fram í lánasamningi milli Styrks og VBS frá 31. júlí 2008.

Í dómnum kemur fram að TM hafi um langt skeið reynt að innheimta peningamarkaðslánin sem voru veitt í byrjun árs 2008 sem „slitastjórn stefnanda telur að hafi tengst samkomulagi stjórnenda VBS og FL group hf. um að stefnandi skyldi kaupa hlutabréf í FL group hf. sem skráð voru í kauphöll. Stefndi er og var þá í eigu FL group hf. Hafi samkomulagið frá 18. maí 2009 sem vísað sé til í kaupsamningnum um uppgjör á þeirri skuld verið gert til uppgjörs á framlagi stefnda til stefnanda sem nýtt hafi verið til kaupa stefnanda á hlutabréfum í FL group hf.“