Verðbólgan minnkar niður í 4,2%

Ársverðbólgan minnkaði í október niður í 4,2% en hún mældist 4,3% í síðasta mánuði. Þetta er þvert á spár sérfræðinga sem gert höfðu ráð fyrir óbreyttri verðbólgu eða að hún hækkaði í 4,4 til 4,5%.

Á vefsíðu Hagstofunnar segir að vísitala neysluverðs miðuð við verðlag í október 2012 er 400,7 stig og hækkaði um 0,28% frá fyrra mánuði. Vísitala neysluverðs án húsnæðis er 382,1 stig og hækkaði um 0,47% frá september.

Verð á dagvörum hækkaði um 0,6% (vísitöluáhrif 0,11%) en kostnaður vegna eigin húsnæðis minnkaði um 0,4% (-0,11%). Þar af voru -0,105% áhrif af lækkun markaðsverðs og -0,05 af lækkun raunvaxta.

Síðastliðna tólf mánuði hefur vísitala neysluverðs hækkað um 4,2% og vísitalan án húsnæðis um 4,7%. Undanfarna þrjá mánuði hefur vísitala neysluverðs hækkað um 0,9% sem jafngildir 3,6% verðbólgu á ári (5,6% verðbólgu á ári fyrir vísitöluna án húsnæðis).