Ræddu efnahagsbrot fram og til baka - málþing Orators í heild sinni

„Töluverður hópur þeirra lögreglumanna sem tók sér varðstöðu þarna (við Alþingishúsið innsk. blm.), starfar hjá sérstökum saksóknara í dag," sagði Ólafur Þór Hauksson, sérstakur saksóknari, við upphaf erindis síns á hátíðþarmálþingi Orators sem fram fór í Lögbergi í gær. Hann sýndi mynd af lögreglumönnum við Alþingishúsið í janúar 2009 þegar hann hóf erindi sitt.

Ólafur Þór fór ítarlega fyrir gang rannsókna embættisins er tengjast hruni fjármálakerfisins í október 2008. Hann sagði yfir hundrað mál er tengjast hruninu vera til rannsóknar og að þeim færi hratt fjölgandi. Um mjög umfangsmikið verk væri að ræða, sem tæki langan tíma að klára.

Jóhannes Karl Sveinsson hrl. flutti einnig erindi og fór yfir ýmsa þætti er tengdust efnahagsbrotum og þeim álitamálum sem vakna þegar þau eru skoðuð. Jóhannes Karl sagði það vera sína tilfinningu að það væri mikill þrýstingur frá þjóðinni um að mönnum verði refsað. Hann sagði jafnframt að það væri um margt einkennileg staða, að nær allir þeir sem til rannsóknar væru teldu sig væntanlega ekkert hafa gert rangt, þ.e. að viðskiptagjörningarnar hefðu ekki verið óeðlilegir eða ólöglegir þegar þeir voru framkvæmdir.

Kristín Edwald hrl., formaður Lögfræðingafélags Íslands, flutti einnig erindi og fór yfir ýmis atriði eru tengdust vinnu lögfræðinga fyrir sakborninga. Meðal annars verklag við yfirheyrslur og fleira.

Hún skaut spurningu á Ólaf í gamni, hvers vegna hefði staðið "hlerun" á glærunni hjá honum en ekki "hlustun" eins og hann hefði sagt í Kastljósviðtali. Ólafur Þór glotti, og sagði að "hlustun" væri annað en hlerun. Þá hlógu gestir málþingsins og flutningsmenn erinda.

Kristín lýsti einnig miklum áhyggjum sínum af því að virðing fyrir lögum réttarríkisins væri ekki nægileg um þessar mundir, m.a. vegna áhrifanna sem hrun fjármálakerfisins hefði haft á íslenskt samfélag. Hún sagðist hafa miklar áhyggjur af þessu, og hvatti til þess að lögmenn, hvar sem þeir störfuðu, stæðu vörð um réttarríkið.

Sjá má erindi Ólafs Þórs, Jóhannesar Karls og Kristínar um efnahagsbrot, á hátíðarmálþingi Orators, í heild sinni hér.