Flugskýli Icelandair hrópar á fleiri flugvirkja

Hlutfall Suðurnesjamanna í viðhaldsstöð Icelandair á Keflavíkurflugvelli hefur fimmfaldast frá því flugskýlið var opnað. Skortur er nú á flugvirkjum.

Það þótti ekki endilega sjálfsögð ákvörðun hjá Icelandair fyrir rúmum tuttugu árum að byggja upp fullkomna viðhaldsstöð á Íslandi fyrir flugflota sinn. Starfsmenn voru um 120 talsins þegar stöðin tók til starfa en nú vinna þar um 300 manns, að sögn Theodórs Brynjólfssonar, yfirflugvirkja Icelandair Technical Services, í viðtali í fréttum Stöðvar 2.

Með þessari uppbyggingu fluttust inn í landið allar stórskoðanir á vélunum, sem á sinn hátt er umtalsverð gjaldeyrissköpun, enda þýðir ein fjögurra vikna C-skoðun, eins og nú stendur yfir, drjúgan skildinginn fyrir dótturfélagið ITS en slík stórskoðun veltir um 150 milljónum króna. Hér er öllum flóknustu verkum sinnt, eins og að skipta um hreyfla, - stykkið kostar um einn og hálfan milljarð króna, - en hér er einnig verið að skipta um hjóla- og lendingarbúnað í heilu lagi.

Stækkun flugflota Icelandair þýðir aukin umsvif í flugskýlinu og segir Theodór að mikil eftirspurn sé nú eftir flugvirkjum. Það vanti fleiri flugvirkja og þótt fyrirtækið hafi ítrekað auglýst eftir flugvirkjum hafi gengið illa að finna fólk innanlands til að leysa þessi störf af hendi. Þá hafi félagið þurft að hafna viðhaldi erlendra flugvéla og segir Theodór það fyrst og fremst vegna þess að þeir eigi fullt í fangi með að sinna viðhaldi eigin véla.

Þegar flugskýlið var tekið í notkun fyrir 19 árum var yfirgnæfandi meirihluti starfsmanna af Reykjavíkursvæðinu en tiltölulega fáir af Suðurnesjum og áætlar Theodór að hlutföllinn hafi verið í kringum 90 prósent úr borginni en 10% af Suðurnesjum. Nú sé hins vegar um helmingur starfsmanna búsettur á Suðurnesjum.