Rannsaka hegðun hvala við Ísland

Háskóli Íslands (HÍ) kynnti í gær samstarfsverkefni um hvalarannsóknir með Alþjóðadýraverndunarsjóðnum (IFAW). Verkefnið er til sex vikna og mun beinast að rannsóknum á hegðun hvala við Ísland.

Rannsóknarskútan Söngur hvalanna, í eigu IFAW, verður notuð við rannsóknirnar en hún er sérhönnuð til verksins. Á kynningunni í gær afhentu þau Rögnvaldur Ólafsson, forstöðumaður Stofnunar rannsóknarsetra HÍ, og Marianne Rasmussen, hvalasérfræðingur við HÍ, Robbie Marsland, yfirmanni IFAW, svokallað eyra sem notað verður til að taka upp hljóð úr hvölunum sem verða til rannsóknar.

Búnaðinum verður komið fyrir vestur af Ísafirði til að nema hljóð hvala sem verða svo rannsökuð. Þá verða einnig stundaðar rannsóknir á hegðun hrefnu í Faxaflóa auk þess sem vísindamennirnir hyggjast kanna hvort hvalaskoðun hefur sjáanleg áhrif á hegðun dýranna.

Rannsóknarskútan verður opin almenningi á milli leiðangra. Gestir geta kynnt sér verkefnið milli klukkan 14 og 17 í dag í skútunni sem liggur við Ægisgarð. - mþl