Caroline Wozniacki gerði góðlátlegt grín að vaxtarlagi Serenu Williams

Caroline Wozniacki gerði góðlátlegt grín að Serenu Williams á kynningarmóti sem fram fór í Brasilíu um helgina. Hin danska Wozniacki tróð handklæði inn á sig til þess að líkjast bandarísku tennisstjörnunni Williams í sýningarleik gegn hinni rússnesku Mariu Sharapovu. Leikurinn var hluti af kynningu á tennisíþróttinni í Brasilíu í tengslum við ólympíuleikana sem fara fram í Rio de Janeiro árið 2016.

Williams tekur einnig þátt í þessu kynningarátaki en það fylgir ekki sögunni að hún hafi gefið leyfi fyrir þessu uppátæki. Williams hefur haft yfirburði í þeim viðureignum sem hún hefur mætt Wozniaki en sú bandaríska hefur fagnað sigri fimm sinnum í alls sex viðureignum þeirra.

Norður-írski kylfingurinn, Rory McIlroy, sem er unnusti Wozniaki var á meðal áhorfenda en hann er í efsta sæti heimslistans í golfi.

Sharapova hafði betur í þessum sýningarleik – 6-2, 7-6.