Helena og félagar héldu sigurgöngunni áfram á heimavelli

Helena Sverrisdóttir og félagar hennar í slóvakíska liðinu Good Angels Kosice unnu tíu stiga sigur á rússneska félaginu Nadezhda Orenburg, 77-67, í Euroleague í kvöld.

Helena spilaði í 17 mínútur og 41 sekúndu í leiknum og var með 3 stig, 7 fráköst, 1 stoðsendingu og 1 stolinn bolta. Helena tók aðeins eitt skot í leiknum og hitti úr því sem var fyrir utan þriggja stiga línuna.

Bandaríski bakvörðurinn Alexandria Quigley var stigahæst með 21 stig en tékkneski miðherjinn Petra Kulichová var með 15 stig og 9 fráköst.

Good Angels Kosice er búið að vinna 5 af 7 leikjum sínum í Euroleague á þessari leiktíð þar af alla fjóra leiki liðsins á heimavelli sínum. Liðið er í toppbaráttunni í sínum riðli sem inniheldur sjö lið.