Kiel marði Wetzlar í endurkomu Arons

Aron Pálmarsson snéri aftur í lið Kiel sem sigraði Wetzlar í þýsku úrvalsdeildinni í handbolta í dag. Aron skoraði 4 mörk, öll í fyrri hálfleik og Guðjón Valur Sigurðsson eitt.

Kiel tapaði óvænt fyrir Melsungen í síðustu umferð á heimavelli og fór ekkert of vel af stað í dag. Wetzlar var lengi vel þremur mörkum yfir en Kiel komst yfir fyrir leikhlé 13-14.

Aron var markahæstur leikmanna Kiel í fyrri hálfleik með 4 mörk en hann var að snúa til baka eftir meiðsli.

Leikurinn var jafn og spennandi framan af seinni hálfleik en Kiel virtist vera að gera út um leikinn þegar Christian Zeitz kom liðinu í 27-24 þegar fimm mínútur voru eftir.

Kiel skoraði ekki meira í leiknum og heimamenn náðu að minnka muninn í eitt mark en liðið náði ekki að nýta eina einustu sókn síðustu 2 mínútur leiksins, þrátt fyrir að vera einum fleiri og Kiel fagnaði sigri.

Momir Ilic var markhæstur hjá Kiel með 5 mörk. Aron skoraði 4 líkt og Zeitz og Christian Sprenger og Marko Vujin skoruðu þrjú mörk hvor.

Michael Müller skoraði sex mörk fyrir Wetzlar, Kevin Schmidt 5 og Jens Tiedtke og Steffen Fäth 4 hvor. Hvorki Fannar Friðgeirsson né Kári Kristján Kristjánsson voru á meðal markaskorara Wetzlar.

Kiel er í öðru sæti deildarinnar með 29 stig, stigi á eftir Rhein-Neckar Löwen. Wetzlar er í 5. sæti með 22 stig.