Ákvörðun norskra stjórnvalda að taka þátt í olíuleit á íslenska Drekasvæðinu er fagnað af væntanlegum leyfishöfum, sem segja þetta skilaboð til olíufélaga heims um að mikils sé að vænta. Steingrímur J. Sigfússon atvinnuvegaráðherra segir að fengur sé að fá Noreg með í verkefnið.
Það er í samræmi við samkomulag um gagnkvæman 25 prósenta rétt á afmörkuðu svæði sem norsk stjórnvöld tilnefndu í morgun Petoro til þátttöku en félagið er að öllu leyti í eigu norska ríkisins og var áður hluti af Statoil. Steingrímur J. Sigfússon atvinnuvegaráðherra telur þetta jákvætt og muni styrkja verkefnið. Fengur sé af því að fá Noreg og norskt ríkisoliufélag með alla sína þekkingu á þessum málum, ekki síst á öryggis- og umhverfismálum varðandi olíuvinnslu á hafi.
Orkustofnun skýrði jafnframt frá því að hún hefði samþykkt tvær af þremur umsóknum, frá Faroe Petroleum og Íslensku kolvetni, og frá Valiant Petroleum og Kolvetni, en þriðja umsóknin, frá Eykon, hefði verið sett á bið og félaginu gefinn frestur til 1. maí til að finna sér samstarfsaðila sem stæðist kröfur um tæknilega getu og fjárhagslegan styrk. Sérleyfin verða þó ekki gefin út fyrr en norska Stórþingið hefur staðfest þátttöku Petoro.
Fulltrúi Kolvetnis, Haukur Óskarsson, frá verkfræðistofnunni Mannviti, segir aðkomu norska ríkisins gleðileg tíðindi.
„Það sem þetta gerir er að það sýnir okkur að Norðmenn hafa sömu trú og við á það að þarna finnist olía," segir Haukur.
Þá felist í þessu verðmæt kynning á Drekasvæðinu.
„Svæðið verður hærra á sjóndeildarhringnum heldur en áður var og mun draga athygli að sér, - annarra aðila sem eru í þessum olíuleitarbransa."
Valur
FH
