Vegagerðin: Ófært á Steingrímsfjarðarheiði og Holtavörðuheiði

Óveður er á sunnanverðu Snæfellsnesi og snjóþekja er á Vatnaleið en hálka á Fróðárheiði samkvæmt upplýsingum frá Vegagerðinni. Einnig er ófært á Holtavörðuheiði og beðið mokstur vegna veðurs. Þæfingsfærð er á Bröttubrekku og skafrenningur.

Á Vestfjörðum er þæfingsfærð og snjóþekja á Barðaströnd en hálka á Kleifaheiði og Hálfdán. Það er snjóþekja á Gemlufallsheiði og mjög víða á norðanverðum Vestfjörðum. Þungfært er á Þröskuldum en ófært á Steingrímsfjarðarheiði, Klettshálsi, Hrafnseyrarheiði og Dynjandisheiði. Á Ströndum er víða þæfingsfærð eða þungfært.

Á Norðurlandi vestra er ófært á Þverárfjalli, Vatnsskarði og frá Hofsós til Siglufjarðar. Á öðrum leiðum er víða snjóþekja, eða hálkublettir. Þæfingsfærð er á nokkrum fáfarnari vegum.

Á Norðurlandi eystra er víða ofankoma og stórhríð og víða beðið með mokstur vegna veðurs. Þungfært er á Ólafsfjarðarvegi en ófært milli Akureyrar og Dalvíkur. Þæfingsfærð er á Öxnadalsheiði en ófært í Víkurskarði, Fljótsheiði, Hólasandi, Hófaskarði og Mývatnsöræfum. Þæfingsfærð er á Tjörnesi og þungfært er Möðrudalsöræfum og Vopnafjarðarheiði.

Á Austurlandi er víða snjókoma og snjóþekja á vegum. Snjóþekja og skafrenningur er á Fjarðarheiði, snjóþekja og stórhríð á Fagradal og hálka og snjókoma í Oddskarði. Breiðdalsheiði og Öxi eru ófærar en vegur er að heita má auður með ströndinni frá Reyðarfirði og suður úr.