Ætlar að ná minnst fimm mönnum inn

„Ég er mjög þakklátur fyrir það traust sem mér er sýnt, segir Árni Páll Árnason, þingmaður Samfylkingarinnar. Hann bendir á að þetta sé sérstaklega mikill og góður stuðningur í ljósi þess að hann hafi verið á þingi og í ríkisstjórn á erfiðum tíma. Honum hafi verið treyst til þess að vinna að verkefnum sem enginn jafnaðarmaður vilji þurfa að vinna að, eins og niðurskurði í velferðarkerfinu.

„Alveg örugglega fimm," segir hann aðspurður um það hvað hann telji að flokkurinn geti fengið marga menn kjörna í Suðvesturkjördæmi í þingkosningunum á næsta ári. „Svo sjáum við til hvort við fáum eitthvað meira," segir Árni Páll. Flokkurinn fékk fjóra menn kjörna í síðustu kosningum. Hann er vongóður um það að Samfylkingin geti bætt við sig. En þá verði Samfylkingarmenn að sannfæra þjóðina um að flokkurinn geti verið afl breytinga. Að Samfylkingin geti áfram leitt þjóðina til betri vegar.