20% Íslendinga standa utan stéttarfélaga

Á Íslandi er áætlað að tæplega einn af hverjum fimm sem eru starfandi á vinnumarkaðinum standi utan stéttarfélaga eða um 25 þúsund manns.

Þetta kemur fram í tilkynningu frá Félagi lykilmanna sem hefur formlega hafið störf. Skrifstofur félagsins eru staðsettar á Laugavegi 170. Ljóst er að flestir í þeim hópi hafa ekki afkomuskjól ef alvarleg veikindi eða slys ber að höndum.

Félag lykilmanna hefur gert samninginn við Sjóvá um tryggingar félagsmanna. Samningurinn tryggir 80% af launum vegna langvarandi fjarveru frá vinnu vegna veikinda eða slysa. Jafnframt tryggir samningurinn greiðslu dánarbóta sem eru að lágmarki 700 þúsund krónur og að hámarki 10 milljónir króna.

Félagið einskorðar þjónustu sína við ákveðna þætti og býður t.d. ekki upp á orlofshús eða styrki vegna líkamsræktar og er ekki aðili að heildarsamtökum. Félagsgjald FLM er 0,05% en vinnuveitandi greiðir áfram sjúkrasjóðsiðgjald sem er 1%. Ekki eru innheimt iðgjöld í orlofssjóð eða fræðslusjóð.