Meiðslin tóku sig upp í keilu

Óvíst er hvenær Andrew Bynum geti spilað körfubolta á ný en hnémeiðsli tóku sig upp eftir keiluferð kappans á dögunum.

Bynum gekk í raðir Philadelphia 76ers frá LA Lakers í sumar en á enn eftir að spila með fyrrnefnda liðinu.

Hann hefur verið með brjóskskemmdir í vinstra hné sem bólgnaði upp eftir áðurnefnda keiluferð. Bynum hefur einnig verið að glíma við meiðsli í hægra hnénu og var hann í stífri meðhöndlun hjá þýskum lækni vegna meiðslanna í sumar.

„Ef þetta gerist í keilu - hvað gerist þá þegar ég stekk upp í troðslu," er haft eftir Bynum í bandarískjum fjölmiðlum.

Búist var við því að Bynum yrði leikfær á ný um miðjan desember en nú er það talið óvíst.