Sár vöntun á húsnæði fyrir stúdenta og ungt fólk

Lágmarksframfærsla frá LÍN dugar engan veginn fyrir útgjöldum, ekki síst vegna þess hve húsnæðiskostnaður hefur hækkað mikið. Hagsmunafulltrúi Stúdentaráðs Háskóla Íslands segir vanda vegna húsnæðisskorts sífellt verða umfangsmeiri, en biðlisti eftir stúdentaíbúðum hefur aldrei verið lengri.

Fasteignaverð á höfuðborgarsvæðinu hefur verið að þokast upp á við að undanförnu, og velta í viðskiptum að aukast. Þannig var velta í októbermánuði 16,4 milljarðar króna, sem er ríflega 37 prósent aukning milli ára, samkvæmt tölum sem Þjóðskrá Íslands birti á vef sínum í gær.

Þrátt fyrir aukin umsvif, bendir margt til þess að mikil vöntun sé á húsnæði fyrir ungt fólk, enda lítið sem ekkert verið byggt í næstum fimm ár, eða frá því í byrjun árs 2008. Fjármálakerfið og krónan hrundu í október 2008.

Davíð Ingi Magnússon, hagsmunafulltrúi Stúdentaráðs Háskóla Íslands, segir að vandamál á fasteignamarkaði, þegar kemur að ungu fólki, blasa við. Mikil hækkun á leiguverði, takmarkaðir möguleikar á húsnæði og lengsti biðlisti í sögunni eftir stúdentaíbúðum, segi sína sögu um hvernig landið liggur.

"Það eru 900 manns á biðlista eftir stúdentaíbúðum í dag, og þeim fer ekkert fækkandi. Leiguverðið á markaði er mjög hátt, en minnstu einstaklingsíbúðir eru leigðar á um 100 þúsund krónur á mánuði. Þegar námslánin frá LÍN eru 140.600 krónur, þá gengur dæmið einfaldlega ekki upp," segir Davíð Ingi.

Um 300 nýjar íbúðir fyrir stúdenta verða teknar í notkun á næsta ári, en það dugar skammt.

"Biðlistinn er alltaf að lengjast, þannig að 300 nýjar íbúðir hafa lítið að segja."

Greint var frá því í fréttum Stöðvar 2 fyrr í vikunni að fjárfestar væru farnir að veðja á mikla hækkun fasteignaverðs á höfuðborgarsvæðinu á næstu árum, en fjárfestingasjóðir hafa að undanförnu keypt húsnæði fyrir um 40 milljarða króna, og eru lífeyrissjóðir á meðal þeirra sem lagt hafa fé í þessa sjóðir.

Sjóður á vegum GAMMA, rekstrarfélags verðbréfasjóða, hefur á undanförnum mánuðum keypt ríflega 100 íbúðir í miðbæ Reykjavíkur fyrir um fjóra milljarða, þar sem horft er til þess að fasteignaverðið muni hækka mikið á þessu svæði, það er í póstnúmerum 101, 107 og 105, á næstu árum. Byggja spárnar um mikla hækkun ekki síst á því að framboð af húsnæði á þessu svæði sé takmarkað, og byggingakostnaður hár, á meðan eftirspurnin eykst ár frá ári.