Bókunum ætlað að þjálfa börn í einbeitingu og athygli

Bókaforlagið Setberg segir engar bækur hafnar yfir gagnrýni og segir það sína von að sú gagnrýni verði heiðarleg, réttmæt og sanngjörn. Þetta kemur fram í yfirlýsingu frá Setbergi þar sem tilurð bókanna Blá bókin mín og Bleika bókin mín, sem eru útlendar eru útskýrðar.

Það var listamaðurinn Soffía Gísladóttir sem vakti athygli á sérkennilegum muni bókanna. Þannig eru stúlkur sýnda að þrífa í Bleiku bókinni minni á meðan strákarnir fara út í geim.

Málið vakti töluverða athygli á Facebook en hátt í 1000 manns hafa deilt gagnrýni Soffíu. Í yfirlýsingu Setbergs segir meðal annars:

„Setberg bókaforlag hefur á 60 árum gefið út 850 bókartitla, þar af um 400 barna- og unglingabækur. Gefur augaleið að ekkert verður ályktað um skoðun útgefandans á mönnum og málefnum út frá öllum þessum bókum, svo mismunandi eru þær.

Vegna umræðu um kynjamismun í tengslum við Bleiku bókina mína og Bláu bókina mína, sem eru barnabækur með þrautum, gátum og límmyndum, er rétt að taka fram að þær hafa notið vinsælda víða um lönd, s.s. í Bretlandi, Kanada og upprunalandinu Ástralíu. Þess vegna eru þær gefnar út hér á landi."

Svo segir að í hvorri bók sé vissulega ætlað að höfða til annars kynsins, önnur er bleik fyrir stúlkur, hin blá fyrir stráka, og þær eru að efni til mismunandi og ekki að fullu sambærilegar.

„Í Bleiku bókinni minni eru kaflar um orð, tölur og leiki, dýr, liti og form, leikföng og loks um að heima sé best. Í Bláu bókinni minni eru kaflar um sveitina, villt dýr, bíla, stór farartæki, risaeðlur og geiminn. Bókunum er ætlað að þjálfa börn í einbeitingu og athygli," segir svo í tilkynningunni.

Svo endar hún á þessum orðum: „Bleika bókin mín og Bláa bókin mín eru ekki frekar en aðrar bækur, hvort sem þær eru ætlaðar fullorðnum eða börnum, hafnar yfir gagnrýni. Það er eina von forlagsins að sú gagnrýni verði heiðarleg, réttmæt og sanngjörn."