Lærisveinar Guðmundar óstöðvandi

Lið Guðmundar Guðmundssonar, Rhein-Neckar Löwen, komst í dag á topp þýsku úrvalsdeildarinnar í handknattleik er það vann öruggan sigur, 31-26, á Lemgo.

Löwen var fjórum mörkum yfir í hálfleik, 14-10, og keyrði svo yfir Lemgo-liðið strax í upphafi seinni hálfleiks með því að skora fyrstu fimm mörk hálfleiksins.

Alexander Petersson átti góðan leik fyrir Löwen og skoraði fimm mörk.

Löwen er með 14 stig, jafnmörg og Fuchse Berlin en búið að spila færri leiki. Löwen er búið að vinna alla sjö leiki sína í vetur.