Langmest verðtryggingarmisvægi hjá Landsbankanum

Verðtryggingarmisvægi viðskiptabankanna, Arion banka, Íslandsbanka og Landsbankans, nemur ríflega 208 milljörðum króna, samkvæmt tölum sem birtar eru í fjármálastöðugleikariti Seðlabanka Íslands. Það þýðir að verðtryggðar eignir bankanna voru meiri en verðtryggðar skuldir þeirra, sem nemur ofangreindri tölu. Mest er misvægið hjá Landsbankanum, eða 73 prósent af eiginfjárgrunni. Hjá Arion er það 32 af eiginfjárgrunni og hjá Íslandsbanka 6 prósent af eiginfjárgrunni.

Þetta misvægi þýðir að bankarnir hagnast á verðbólgu, en eins og greint var frá á Vísi í gær, hefur hagnaður bankanna horft til síðustu tólf mánaða numi 8,9 milljörðum vegna þessa.

Til lengri tíma litið tapa hins vegar allir á mikilli verðbólgu og bankarnir sömuleiðis, þar sem há verðbólga þýðir hærra nafnvaxtastig, sem dregur úr hagnaðinum til lengri tíma. Til skemmri tíma getur mikið verðtryggingarmisvægi hins vegar búið til hagnað, líkt og gerst hefur undanfarin misseri.

Seðlabanki Íslands hefur fjallað um það, að æskilegt sé að draga úr fyrrnefndu misvægi, svo að bankarnir hafi ekki hvata að því að hafa verðbólguna mikla.

Sjá má fjármálastöðugleikarit Seðlabanka Íslands, sem kynnt var í síðustu viku, hér (umfjöllun um verðtryggingarmisvægi er á síðum 32 og 33).