Ísland náði sér ekki á strik á fyrsta hringum á HM í Tyrklandi

Íslenska kvennalandsliðið í golfi náði sér ekki á strik á fyrsta keppnisdeginum á heimsmeistaramóti áhugamanna sem fram fer í Tyrklandi. Ísland er þessa stundina í 43. sæti af alls 56 liðum sem taka þátt. Tvö bestu skorin af alls þremur telja í hverri umferð en leiknar eru 72 holur eða fjórir hringir.

Valdís Þóra Jónsdóttir, Íslandsmeistari í höggleik 2012, lék á 77 höggum í dag eða 5 höggum yfir pari og er hún í 81. sæti í einstaklingskeppninni. Ólafía Þórunn Kristinsdóttir úr GR og Guðrún Brá Björgvinsdóttir úr GK léku báðar á 79 höggum í dag eða +7, og eru þær í 106. sæti.

Keppni heldur áfram á morgun en Suður-Kórea hefur titil að verja í kvennaflokknum frá því að mótið fór fram fyrir tveimur árum í Argentínu.

Staðan á mótinu í einstaklingskeppninni

Staðan á mótinu í liðakeppninni.