Kaup Samherja á Olís samþykkt

Samkeppniseftirlitið hefur samþykkt kaup Samherja á Olís með skilyrðum. Þetta staðfestir Páll Gunnar Pálsson, forstjóri Samkeppniseftirlitsins, í samtali við Vísi. Hann segir að gerð hafi verið sátt við samrunaaðila sem felur í sér að þeir skuldbinda sig til ákveðinna aðgerða til að stuðla að samkeppni.

Þetta felur í sér að tryggja samkeppnislegt sjálfstæði Olís og tryggja að olíufélagið verði ekki vettvangur einhverskonar samstarfs sjávarútvegsfyrirtækja, en ljóst er að nú eiga tvö sjávarútvegsfyrirtæki hlut í Olís. Það eru Samherji og Fisk Seafood.

Páll Gunnar segir að ákvörðun Samkeppniseftirlitsins verði birt á netinu von bráðar.