Alfreð: Fæ vonandi tækifæri með landsliðinu nú

Alfreð Finnbogason vonast til þess að fá tækifæri til að sýna sitt í íslenska landsliðsbúningnum. Ísland mætir Noregi á föstudagskvöldið.

„Ég hef kannski ekki fengið þau tækifæri sem ég hef leitast eftir í íslenska landsliðinu. Kannski opnast fyrir þann möguleika nú," sagði Alfreð í samtali við Hjört Hjartarson á X-inu í dag.

„Ég er auðvitað stoltur og ánægður með að vera valinn í íslenska landsliðið. Ég hef verið í byrjunarliðinu í einum leik og skorað tvö mörk. Ég tel það ágætis tölfræði."

Alfreð skoraði tvö mörk með liði sínu, Heerenveen, í 2-2 jafntefli gegn Ajax um helgina. „Sjálfstraustið er í góðu lagi og ef kallið kemur gegn Noregi þá verð ég klár."

Óvíst er um þátttöku Kolbeins Sigþórssonar sem spilaði ekki með Ajax um helgina vegna meiðsla. Björn Bergmann Sigurðarson er meiddur og þá var Eiður Smári Guðjohnsen ekki valinn í landsliðið nú.