Óttast um atvinnu sjómanna í Eyjum

Sjómannafélagið Jötunn segir að með sölu útgerðarfyrirtækisins Bergs-Hugins sé atvinnu um 40 sjómanna í Vestmannaeyjum stefnt í mikla óvissu. Að mati sjómannafélagsins hefði átt að bjóða heimamönnum í Vestmannaeyjum fyrirtækið til sölu áður en leitað var annað.

Fyrirtækið var selt til Síldarvinnslunnar í Neskaupsstað en með kaupunum jók Síldarvinnslan aflaheimildir sínar í bolfiski umtalsvert. Í tilkynningu frá Síldarvinnslunni sagði á sínum tíma að Bergur-Huginn yrði áfram rekið sem sjálfstætt félag og þó höfuðstöðvar Síldarvinnslunnar væru í Neskaupsstað væri stefnt að því að gera út bæði þaðan og frá Vestmannaeyjum.

Þrátt fyrir það bera sjómenn í Vestmannaeyjum ugg í brjósti og óttast um atvinnu sjómanna í Vestmannaeyjum. „Að hafa mannaforráð er ábyrgðarstaða og þegar menn eru á þeim stað verður að sína samfélags- og siðferðislega ábyrgð og standa með sínu fólki og reyna með öllum ráðum að tryggja afkomu þess til framtíðar," segir í tilkynningu frá sjómannafélaginu Jötni.

Rétt hefði verið að bjóða eyjamönnum fyrirtækið til kaups en fyrst það var ekki gert lýsir Jötunn fullum stuðningi við bæjaryfirvöld ef þau hyggjast nýta forkaupsréttarákvæði í lögum, þ.e. ef bærinn reynir að kaupa Berg-Huginn á sömu kjörum og Síldarvinnslunni buðust.