Fyrsti sjónvarpsfréttamaðurinn sem birtist í íslensku sjónvarpi, Magnús Bjarnfreðsson, er látinn, 78 ára að aldri. Hann lést í gær 30. ágúst, á líknardeild Landsspítalans í Kópavogi, eftir langvarandi veikindi.
Magnús Bjarnfreðsson og Markús Örn Antonsson voru fyrstu fréttamennirnir sem ráðnir voru til Ríkisútvarpsins Sjónvarps og það var Magnús sem flutti fyrstu íslensku sjónvarpsfréttirnar að kvöldi þann 30. september árið 1966 og varð um leið einn af heimilisvinum landsmanna.
Röddin var þá þegar orðin þjóðþekkt en Magnús hafði áður starfað sem útvarpsþulur og hafði einnig mikla reynslu sem blaðamaður, á Fálkanum, Frjálsri þjóð og Tímanum. Magnús hætti í sjónvarpsfréttum þegar hann gerðist bæjarfulltrúi í Kópavogi árið 1974 og starfaði hin seinni ár að almannatengslum.
Magnús var fæddur 9. febrúar 1934 á Efri-Steinsmýri í Meðallandi í Vestur-Skaftafellssýslu. Hann var sonur hjónanna Bjarnfreðar Ingimundarsonar og Ingibjargar Sigurbergsdóttir en ólst upp hjá fósturforeldrum sínum, þeim Páli Pálssyni og Magneu Magnúsdóttur í Efri-Vík í Landbroti. Hann var einn af 21 systkini og var sá sextándi í röðinni. Meðal systkina hans var Aðalheiður Bjarnfreðsdóttir, verkalýðsforingi og alþingismaður.
Magnús lætur eftir sig eiginkonu, Guðrúnu Árnadóttur og fjögur börn; Guðjón fæddan 1960, Árna 1965, Pál 1971 og Ingibjörgu 1973.
Fyrsti sjónvarpsfréttamaður Íslands kveður
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
