Ók langt yfir hámarkshraða nærri skólanum sem hann vinnur í

Þessa vikuna hefur lögreglan aukið umferðareftirlit á höfuðborgarsvæðinu, en eftirlit hennar beinist ekki síst að akstri við grunnskólana enda skólaárið nýhafið.

Að mati lögreglunnar hefur umferðin almennt séð gengið vel fyrir sig og langflestir virða hámarkshraða.

Undantekningarnar eru samt nokkrar en í gærmorgun stöðvaði lögreglan för ökumanns við einn grunnskóla í umdæminu. Sá ók á 61 km hraða þar sem hámarkshraði er 30.

Viðkomandi rétt sleppur við sviptingu ökuréttinda en verður sektaður fyrir glannaskapinn. Ökumaðurinn var fullur iðrunar og miður sín þegar lögreglan upplýsti hann um hraðann.

Það er von lögreglu að þetta endurtaki sig ekki hjá umræddum ökumanni, en þess má geta að hann er starfsmaður í sama skóla og hann var stöðvaður í nágrenni við.