Alvarlegt að skuldarar fái ekki að hafa samráð

Á meðan fjármálafyrirtæki fá að hafa víðtækt samráð um hvernig rétt sé að beita sér í gengislánamálunum fá skuldarar ekki að ráðfæra sig hver við annan. Þetta er áhyggjuefni að mati Samtaka lánþega og getur skilað sér í að málin séu illa unnin og niðurstöðurnar rangar.

Prófmálin ellefu í gengislánamálunum verða flest þingfest nú í haust og munu fá flýtimeðferð í dómskerfinu. Þó að Guðmundur Andri Skúlason, formaður Samtaka lánþega, fagni því að allir leggist á eitt til að fá endanlega lausn á málin hefur hann áhyggjur af því að hraðinn á málunum geti bitnað á málatilbúnaði skuldaranna.

Honum finnst einnig alvarlegt að fjármálafyrirtæki landsins fái að hafa samráð um hvernig best er að beita sér í málunum meðan skuldararnir hafi ekki einu sinni fengið að vita hverjir eru aðilar að öllum málunum.

„Fjármálafyrirtækin hafa haft mörg ár til að liggja yfir þessum málum með sínar lögfræðideildir á meðan við sem skuldarar erum allir búnir að vera í sitthvoru horninu með sitthvor málin og ekkert samráð," segir Guðmundur.

Á meðan fjármálafyrirtækin fá tækifæri til að samstilla kröfugerð sína situr hver skuldari einn í sínu horni.

„Og við getum átt það á hættu að sum mál sem eiga að svara mikilvægum spurningum verði illa unnin af hálfu skuldaranna," segir hann.

Í fréttum að undanförnu hefur komið fram að endanleg niðurstaða í málin geti verið komin innan fárra mánaða vegna flýtimeðferðarinnar. Guðmundur er ekki svo bjartsýnn. Hann telur að grundvallarspurning í málunum verði hvort heimilt sé að breyta vöxtunum á gengislánum afturvirkt. Svör Hæstaréttar hafa verið misvísandi og því sé þörf á skýrari niðurstöðu.

„Það er sú spurning sem þarf að senda til EFTA og fá skýrt svar þar. Á meðan við erum ekki komnir með svar við því hvort það megi breyta vöxtum á lánunum þá er ekkert hægt að svara spurningunni á hvaða lánum má breyta vöxtum. Þannig að meðan þeirri spurningu er svarað þá liggja öll mál stopp," segir Guðmundur.

Því telur hann blasa við að endanleg niðurstaða í málunum muni ekki liggja fyrir fyrr en eftir 1-2 ár þegar EFTA hefur komist að sinni niðurstöðu.