Verulega dregur úr verðbólgunni, mælist 4,1% í ágúst

Ársverðbólgan minnkaði niður í 4,1% í ágúst en hún mældist 4,6% í júlí. Þetta er þvert á spár sérfræðinga sem flestir reiknuðu með óbreyttri verðbólgu eða lítilsháttar aukningu á henni.

Á vefsíðu Hagstofunnar segir að vísitala neysluverðs miðuð við verðlag í ágúst 2012 er 396,6 stig og lækkaði um 0,15% frá fyrra mánuði. Vísitala neysluverðs án húsnæðis er 376,6 stig og lækkaði um 0,08% frá júlí.

Sumarútsölur eru víða um garð gengnar og hækkaði verð á fötum og skóm um 5,3% (vísitöluáhrif 0,26%). Flugfargjöld til útlanda lækkuðu um 12,6% (-0,21%) en verð á bensíni og díselolíu hækkaði um 2,8% (0,16%). Verð á mat- og drykkjarvörum lækkaði um 1,0% (-0,15%) og verð á nýjum bílum lækkaði um 1,8% (-0,10%).

Síðastliðna tólf mánuði hefur vísitala neysluverðs hækkað um 4,1% og vísitalan án húsnæðis um 4,3%. Undanfarna þrjá mánuði hefur vísitala neysluverðs lækkað um 0,4% sem jafngildir 1,5% verðhjöðnun á ári (1,9% verðhjöðnun á ári fyrir vísitöluna án húsnæðis).

Vísitala neysluverðs samkvæmt útreikningi í ágúst 2012, sem er 396,6 stig, gildir til verðtryggingar í október 2012. Vísitala fyrir eldri fjárskuldbindingar, sem breytast eftir lánskjaravísitölu, er 7.831 stig fyrir október 2012.