Hagnaður Eimskips 1,2 milljarðar

Hagnaður Eimskips eftir skatta á fyrstu sex mánuðum ársins nam 8 milljónum evra eða um 1,2 milljörðum króna.

Í tilkynningu segir að heildarvelta Eimskips var 198,1 milljónir evra fyrstu sex mánuði ársins 2012 samanborið við 186,5 milljónir evra á fyrri hluta ársins 2011. Að teknu tilliti til einskiptisliðar á árinu 2011 að fjárhæð 6,4 milljónir evra jókst veltan um 10,0% á milli ára.

Á árinu 2012 rekur félagið tvö skip á Ameríkuleið samanborið við eitt skip á árinu 2011. Viðbótarskipið eykur flutningsmagn sitt jafnt og þétt en hefur ekki náð fullri nýtingu sem hefur áhrif á samanburð á rekstrarafkomu á milli ára.

Heildareignir félagsins í lok júní námu 299,8 milljónum evra, vaxtaberandi skuldir námu 61,9 milljón evra og var eiginfjárhlutfallið 61,6%. Handbært fé nam 27,2 milljónum evra í lok júní 2012 og hafði lækkað um 16,3 milljónir evra frá árslokum 2011, einkum vegna fjárfestinga í skipum.

„Afkoman af reglulegri starfsemi fyrstu sex mánuði ársins var umfram væntingar félagsins. Nýju siglingaleiðinni á milli Norður-Noregs og Norður-Ameríku hefur verið vel tekið og eykst flutningsmagnið jafnt og þétt á þeirri leið, en almennt var góður gangur í eigin flutningastarfsemi og jókst flutningsmagn í siglingakerfum félagsins á Norður-Atlantshafi um 7,4% fyrstu sex mánuði ársins samanborið við sama tímabil í fyrra," segir Gylfi Sigfússon, forstjóri Eimskips í tilkynningunni.

„Flutningsmagn í alþjóðlegri frystiflutningsmiðlun félagsins stóð í stað fyrstu sex mánuði ársins samanborið við síðasta ár á meðan magn í alþjóðlegri flutningsmiðlun á þurrvöru jókst verulega á milli ára. Eimskip reiknar með að fá tvö gámaskip sem eru í smíðum í Kína afhent á fyrri hluta ársins 2013, en nýju skipin munu styrkja siglingakerfi og þjónustuframboð félagsins, auk þess sem þau munu skapa ný störf."