Króatar tóku bronsið - unnu Ungverja létt

Króatar urðu í þriðja sæti í handboltakeppni karla á Ólympíuleikunum í London eftir öruggan sjö marka sigur á Íslandsbönum Ungverja, 33-26, í leiknum um bronsverðlaunin. Króatar voru fimm mörkum yfir í hálfleik og náðu mest átta marka forskoti í seinni hálfleiknum þannig að sigurinn var afar sannfærandi.

Ungverjar töpuðu því báðum leikjum sínum eftir að þeir slógu íslenska liðið út í tvíframlengdum leik í átta liða úrslitunum á miðvikudaginn var. Ungverjar duttu út fyrir Svíum í undanúrslitunum en Svíar mæta Frökkum í úrslitaleiknum á eftir.

Ivan Cupic var markahæstur hjá Króatíu með átta mörk, Blazenko Lackovic skoraði sjö mörk og Domagoj Duvnjak var með sex mörk. Gergely Harsányi skoraði mest fyrir Ungverja eða sjö mörk.

Ungverjar héngu í Króötum fram í miðjan fyrri hálfleik þegar staðan var 7-8 fyrir Króatíu en Króatar voru 19-14 yfir í hálfleik. Króatar voru komnir 23-16 yfir eftir sjö mínútur í seinni en Ungverjar náðu muninum niður í þrjú mörk um miðjan seinni hálfleik. Nær komust þeir ekki og Króatar tryggðu sér bronsið með sannfærandi hætti.

Þetta eru þriðju verðlaun Króata í handbolta karla á Ólympíuleikum en þeir urðu Ólympíumeistarar í Atlanta 1996 og í Aþenu 2004. Króatar hafa einnig unnið 4 verðlaun á Heimsmeistaramótum (1 gull og 3 silfur) og fjögur verðlaun á Evrópumeistaramótum (2 silfur og 2 brons).