Sjálfstæðismenn í borginni vilja að ríkið endurskoði áform sín

Sjálfstæðismenn í borgarráði vilja að borgarráð hvetji ríkisstjórn Íslands til þess að endurskoða áform hækkanir á gistináttaskatti. Benda sjálfstæðismenn á að þessar breytingar muni hafa mjög alvarleg áhrif á rekstrarumhverfi ferðaþjónustunnar og bitna sérstaklega hart á reykvísku atvinnulífi. Sjálfstæðismenn lögðu fram tillögu um þetta á borgarráðsfundi í dag, en meirihluti borgarráðs vildi ekki samþykkja tillöguna og var henni þvi frestað.

Í tillögu borgarráðs segir að Reykjavíkurborg sé ferðamannaborg og stefni að því að auka þátt ferðaþjónustunnar. Í höfuðborginni séu staðsett flest hótel og gistihús landsins og fjölmörg fyrirtæki byggi afkomu sína á annars konar þjónustu við ferðamenn. Áhugi á uppbyggingu nýrra hótelrýma hafi gefið góða von og endurspeglað trú á bjarta framtíð greinarinnar en hækkun virðisaukaskatts á gistingu úr 7% í 25,5% muni augljóslega setja mörg slík áform í uppnám.

Júlíus Vífill Ingvason, borgarráðsfulltrúi Sjálfstæðisflokksins, undrast þessi viðbrögð minnihlutans. „ Það er með ólíkindum að meirihlutinn standi ekki með þeim fjölmörgu borgarbúum sem hafa lífsviðurværi sitt af ferðaþjónustu. Fyrirhuguð skattahækkun á greinina mun verða gríðarlegt áfall fyrir atvinnulíf borgarinnar og því miður virðist meirihlutinn ekki hafa kjark til þess að mótmæla ríkisstjórninni í þessu máli. Það er óhugsandi annað en að borgarráð beiti sér af fullum þunga þegar svo stórt hagsmunamál er undir."