Umfjöllun og viðtöl: Grindavík - KR 0-1 | Gary Martin skaut KR í úrslit

KR-ingar eru komnir í úrslit Borgunarbikars karla í knattspyrnu þriðja árið í röð eftir 1-0 sigur á Grindavík. Gary Martin skoraði eina mark leiksins undir lok fyrri hálfleiks.

Fyrri hálfleikur var fjörugur og sköpuðu bæði lið sér ágætis færi til skiptis. Besta færi Grindvíkinga fékk Hafþór Ægir Vilhjálmsson en skot hans fór framhjá eftir viðkomu í samherja.

KR–ingar fengu ívið fleiri færi. Það var þó ekki fyrr en á markamínútunni, þeirri 43., sem þeir náðu forystunni með fallegu marki Gary Martin.

Grétar Sigfinnur Sigurðarson gaf laglegan bolta inn í teiginn sem Gary afgreiddi af yfirvegun innan fótar út við stöng. Óverjandi fyrir Óskar Pétursson markvörð Grindvíkinga. Staðan í leikhlé 1–0 fyrir KR.

Síðari hálfleikurinn fór mjög rólega af stað. Hvorugt liðið náði að skapa sér teljandi marktækifæri.

Heimamenn ógnuðu marki KR ekki mikið. Helst voru það föst leikatriði sem ullu KR-ingum vandræðum. Næst komust heimamenn því að skora þegar boltinn hrökk af Viktori Bjarka Arnarsyni leikmanni KR og nánast í eigið net.

Leikurinn rann út og sæti KR í úrslitum bikarsins í fjórða sinn á fimm árum staðreynd.

Bestu leikmenn vallarins í kvöld hjá heimamönnum voru Iain James Williamson og Alexander Magnússon á miðjunni.

Hjá KR var aftasta línan afar traust fyrir framan landsliðsmarkvörðinn Hannes Þór Halldórsson sem vart steig feilspor í leiknum.





Grétar Sigfinnur: Frábært að vera í bikarúrslitum í fjórða sinn á fimm árumGrétar Sigfinnur Sigurðarson var kampakátur með sætið í úrslitum bikarsins eftir sigurinn á Grindavík hann lagði upp sigurmarkið með frábærri fyrigjöf.

„Maður hefur oft reynt svona sendingar og ekki tekist en sem betur fer gekk hún upp í þetta sinn. Við erum búnir að fara erfiðu leiðina í þennan úrslitaleik og það verður vonandi verður fullur Laugardalsvöllur á móti Stjörnunni."

Grétari er slétt sama hvort úrslitaleikurinn verði ekki færður vegna leiks í enska boltanum.

„Það skiptir mig engu máli hvort leikurinn verði klukkan fjögur eða átta eina sem skiptir máli er að við vinnum þann leik."

Bjarni Guðjónsson: Við erum ekki búnir að vinna neitt enn þáBjarna Guðjónssyni, fyrirliða KR, finnst það í góðu lagi að menn sem hafi spilað með öðrum liðum í bikarnum megi taka þátt með nýju liði. Gary Martin féll úr leik í bikarnum með ÍA en tryggði KR sætið í úrslitunum í ár.

„Gary er hörkuleikmaður og er núna búinn að skora tvö mörk í þremur leikjum. Mér finnst að menn eigi að fá að spila með því liði sem þeir eru í þó svo þeir hafi spilað með öðru liði fyrr í keppninni."

Aðspurður hvort það sé ekki lán að mæta Eyjamönnum í fyrstu umferð eftir þjóðhátíð sagði Bjarni.

„Það hlýtur að koma að því að þeir vinni leik eftir Þjóðhátíð, hvort það verði ár skal ég ekki segja. Við verðum rólegir um helgina tökum frí á laugardag og sunnudag og mætum klárir til Eyja á miðvikudaginn."