Guðjón Valur: Ungverjar með hörkuvörn

Ísland mætir í dag liði Ungverjaland í gríðarlega mikilvægum leik á Ólympíuleikunum í London. Sigurliðið fer áfram í undanúrslit og fær þar með tækifæri til að spila um verðlaun en liðið sem tapar er úr leik.

„Þetta er leikurinn. Við erum búnir að vera með þessa dagsetningu í kollinum síðan að leikjafyrirkomulagið var gefið út," sagði Guðjón Valur við Vísi.

Ungverjar töpuðu þremur af fimm leikjum sínum í B-riðli en stóð þó í Evrópumeisturum Danmerkur lengi vel og fékk á sig fá mörk í flestum leikjum.

„Maður sér á tölunum í þeirra leikjum að þetta er lið sem er með hörkuvörn og góðan markvörð. Aðeins Spánverjarnir náðu að setja meira en 26 mörk á þá."

„Ungverjarnir náð að halda andstæðingnum niðri og það þýðir að við þurfum að fá vörnina í gang og hraðaupphlaupin með. Það virðist nefnilega mjög erfitt að spila gegn þessari vörn enda eru þeir mjög hávaxnir og líkamlega sterkir."

Strákarnir sýndu þó í riðlakeppninni, sér í lagi gegn Frökkum, að þeir eiga svar við sterkum varnarleik. Þess fyrir utan unnu strákarnir sigur á Ungverjum bæði á EM í janúar síðastliðnum og á HM í Svíþjóð í fyrra.

„Okkur tókst þá að spila hratt á þá og hreyfa menn úr stöðunum sínum. Ef okkur tekst að gera það aftur þá eigum við góðan séns."

„En þó svo að við séum nú að spila við liðið sem varð í fjórða sæti í hinum riðlunum þá verður að hafa í huga að það var mjög mikill munur á riðlunum. Það sést best á því að Serbía - silfurliðið frá EM - komst ekki áfram. Ég á því von á hörkuleik."