Snorri Steinn: Þeir áttu ekkert svar

„Þetta var það sem við lögðum upp með. Við byrjuðum leikinn á fullum krafti og vissum að það yrði lykillinn að því að vinna leikinn," sagði Snorri Steinn Guðjónsson, leikmaður íslenska landsliðsins, eftir sigurinn á Túnis í morgun.

„Túnis hefur sýnt að þeir geta spilað gróft og verið brjálaðir og við vildum vera tilbúnir í þann slag. Við svöruðum bara í sömu mynt og þeir áttu ekkert svar við því."

„Við vorum með frábæra vörn, frábæra markvörslu, fengum góð hraðaupphlap og sóknarleikurinn var góður. Ekki yfir neinu að kvarta og góður sigur."

Snorri Steinn hefur átt í erfiðleikum vegna sinaskeiðabólgu og ekkert getað æft að undanförnu. Honum líður þó mun betur nú en til dæmis á sunnudaginn, þegar Ísland mætti Argentínu.

„Mér líður mjög vel. Gærdagurinn og dagurinn í dag eru bestu dagarnir mínir og hvíldin í gær gerði mér mjög gott."

„Við skulum sjá til hvernig næstu klukkutímar verða. Ef ég held þá út þá held ég að þetta verði yfirstaðið."

Snorri Steinn vildi ekkert tjá sig um gjaldþrot félagsliðs síns, AG Kaupmannahafnar, þegar hann var spurður út í það.