Afríkumeisturunum pakkað saman | Myndir

Íslendingar eru komnir á mikið og gott skrið á Ólympíuleikunum í London eftir tvo sigra í fyrstu tveimur leikjum íslenska handboltalandsliðsins. Strákarnir okkar sýndu heimsklassaframmistöðu gegn Túnisum nú í morgunsárið.

Staðan eftir 20 mínútur var orðin 13-3 og Túnisar einfaldlega búnir á því. Íslenska vörnin var sem ókleifur múr í fyrri hálfleik enda vissu leikmenn Túnis ekki sitt rjúkandi ráð.

Niðurstaðan var tíu marka sigur, 32-22, en strákarnir gátu leyft sér að slaka aðeins á klónni í seinni hálfleik og spara aðeins kraftana fyrir næsta leik, sem er gegn Svíum á fimmtudagskvöldið.

Valgarður Gíslason, ljósmyndari Vísis og Fréttablaðsins, var í Koparboxinu í London og tók þessar myndir.