"Skiltaskjálfta ber að sefa"

„Þetta kemur mér á óvart," segir Jakob Frímann Magnússon, framkvæmdastjóri Miðborgarinnar okkar, aðspurður um ákvörðun byggingafulltrúa um að fjarlægja auglýsingaskilti sem sólarhringsfyrirvara í miðborginni.

„Ég er jafn hissa og allir aðrir," segir Jakob. „Það má vel færa rök fyrir því að það þurfi að hafa betra eftirlit með skiltavæðingunni - mögulega hefur hún gengið of langt á ákveðnum svæðum."

Jakob segist hafa staðið í þeirri trú að samkomulag hafi verið í gildi áratugum saman um auglýsingaskiltin en það gerði ráð fyrir að verslunareigendur mættu staðsetja skiltin meter út á gangstétt frá versluninni. Ákvörðun byggingafulltrúa um að skipa rekstraraðilum að fjarlægja skiltin hafi komið honum á óvart sem og þeim hagsmunaaðilum sem hann hefur rætt við í dag. Þörf sé á lýðræðislegri umræðu um málið.

Jakob tekur undir með verslunareigendum sem lýst hafa óánægju sinni með þann stutta fyrirvara sem byggingafulltrúi gaf. „Það á líklega eftir að koma skýring á því af hverju tilkynningin kemur svo skyndilega. Það þarf að gefa mönnum svigrúm."

Þá segir Jakob að hagsmunaaðilar í miðborginni og yfirvöld í Reykjavík þurfi að leysa málið í sameiningu. Hann tekur þó fram á að eðlilegt samráð og skoðanaskipti hafi átt sér stað um ýmis brýn miðborgarmál á undanförnum mánuðum og misserum þó áherslumunur sé um ýmis atriði eins og gengur. Þetta mál hafi hins vegar farið fram hjá öllum hefðbundnum samráðsleiðum. Og standi það vonandi til bóta.